'Wɛ nʋɩ ʋʋa ‑tua" 'kle ɛ
41
Dafi 'a 'dʋ ɔ "nyɩa 'dʋ "jru kpɔ' i ‑tei ɛ.
2 Nyɔ ‑ɔɔ ‑tua" nɩa" jei 'a ‑tɩ' ɛ ɔ nʋ 'mʋa‑,
‑sɔn ‑tɩ 'kle jɛɛ ɔ ɛ, Tʋ "bo a ‑seie ɔ'.
3 Tʋ "bo a siɔ "jriɛ o ‑wɛe ɛ "nyɩɔ 'kmʋ nɩa'
‑wɛe ɔ nɩ 'e 'mʋa‑ 'ʋn 'de 'blʋa "kpei,
'de ɛɛ' "tai ɔ "i 'de ɔɔ' tʋnyʋ 'kwa.
4 ‑Bo ɔ nɩ 'e 'kle 'di Tʋ "bo a ‑tuɛ" ɔɔ' ‑tɩ',
ɛɛ ‑teɔ' sʋn ‑pʋn" 'de 'wɛ blʋɔ'.
5 'Ɩn wlu ka, ‑nʋ' 'ʋn 'saaʋn "jrii Tʋ "bo:
‑Pʋʋ' 'ma ‑suu; 'ɩn nʋɛ ‑ʋn dɛsaʋn "jrii.
6 'Ma tʋnyʋ a wluɛ 'ʋn ‑pee kasaʋnka‑:
Nɔ" ‑jɛɛ 'di ɔ 'je 'mɛ ‑wɛe nyʋ 'je ɔɔ' ‑tɩ' o "mae‑ ‑ɛ?
7 ‑Bo ʋʋa' due' ji 'ʋn kɩɩn ɛ, ɔɔ ‑criɛ' 'ma mɩɔɔ‑.
Ɔɔ 'kɩɩɛn sɩ "jru i 'de ɔ pɛe o,
‑wɛe ‑bo ɔ "si "kpae 'sʋ ɔɔ kpa ɩa' "kuuan.
8 'Ma tʋnyʋ ‑wee'‑ beeɛ o ‑wɛe ʋʋa
naa 'kle ‑jea 'ʋn "kpei ji 'a ‑tɩ' tɔ' i.
9 'Wɛ saʋn mɛ ‑kpʋn' ɔ, ɔ 'pɛn i ɔ se 'pʋ i.
10 'Ma "dɛi 'dɔe, ‑jɔ 'ɩn ‑tea' ‑kwlɩ",
‑ɔ ‑ke 'ma diia ‑ta ‑due ‑mɔ tɔɛ 'ʋn 'kpʋ "i.
11 'Kaa ‑mɔ Tʋ "bo, ‑ɩn ‑je 'ma wɛe,
‑ɩn kpa 'ʋn "jɛi ‑wɛe 'ɩn 'je 'cɛn ‑sa.
12 Ka ‑ɩn ‑kma 'ma ‑tɩ' ka 'ɩn 'jea ɛɛ' juuo sʋn nʋ 'ka ka:
'Ma tʋnyʋ 'bo tʋ 'a "jru kpaa 'de 'ʋn "kpei
13 ‑Ma poɛ 'ʋn sʋn o, ‑ma ‑nyɩɛ" 'ʋn kui sɔn i flɔan',
‑wɛe 'ɩn nɩ 'de ‑ʋn "juɛi 'de nɔ"
‑wee'‑ "klein 'di dɛ ‑nʋɛ 'ɩn se dɛjrɛ' nʋ.
14 "Diwan kpʋn Tʋ "bo, Israɛ ‑kɔʋn 'a Kea,
'de nɔ" 'oo nɔ" ‑wee'‑ "klein 'di, kɩɩn kɩɩn. 'Kɩ 'je nɩ kan' ‑cɛɛn'‑.